Leon The Professional - திரைவிமர்சனம்

[Leon The Professional - திரைவிமர்சனம் ]

நம்ம ஊரு Action King அர்ஜுன் நடிச்ச படம் " சூர்ய பார்வை" , Leon the Professional படத்தோட அக்மார்க் ஈயடிச்சான் காப்பி. Luc Besson இயக்கிய இத்திரைப்படத்தில் Jean Reno (Leon) , Gary Oldman (Stansfield) , Natalie Portman(Mathilda) மற்றும் பலர் நடித்துள்ளனர். IMDB டாப் 250 யில் 32 வது இடத்தை பிடித்துள்ளது.

Luc Besson  நிறைய ஆக்சன்  படங்கள் இயக்கிவுள்ளார். அதில் சில பிரபலமான படைப்புகள் Transporter 2, Taken 1 & 2 , The fifth element , Subway, Etc.  நம்ப படத்தோட ஹீரோ Jean Reno நிறைய படங்கள் நடித்திருக்கிறார். அவர் நடித்த சில ஹிட் படங்கள் Pink Panther 1 & 2 , Godzilla , Da vinci code, Wasabi(நம்ம ஜக்குபாயோட original) , etc… 

 படத்தின் ஹைலைட் Natalie Portman-ன் நடிப்பு  என்றே சொல்லலாம். படத்தின் குட்டி நாயகி Natalie Portman மிக பிரபலமான நடிகை. ஏராளமான வெற்றி படங்களை தந்திருப்பவர். இவர் நடித்த V for Vendetta படத்திற்காக உண்மையிலே மொட்டை அடித்தவர். அந்த படத்திற்கு ஆஸ்கார் தான் மிஸ் ஆயிடுச்சு. ஆனால் Black Swan படத்திற்கு வாங்கிவிட்டார். இவர் நடித்த சில முக்கிய படங்கள் Heat, No Strings Attached , Closer, Thor etc. 

 படத்தின் ஹைலைட் ஒரு 12 வயது சிறுமிக்கு 40 வயது ஆசாமிக்கும் உள்ள ரிலேஷன்ஷிப். கேட்கவே சற்று அருவெறுப்பாக இருக்கு இல்ல? ஆனால் படத்தில் இதை மிக அழகாக காண்பித்து இருப்பார்கள்.

 

படத்தின் கதை என்ன என்பதை பார்க்கலாம் . டோனி என்பவனுடைய அடியாளாக வேலை செய்கிறான் லியான். 12 வயது சிறுமியான  மதில்டா தன் 4 வயது சகோதரன் மற்றும் வேறு திருமணம் செய்துகொண்ட தந்தை, அவர் மனையுடன் அடுக்குமாடி குடிஇருப்பில் வசித்து வருகிறாள். அவள் வீட்டின் பக்கத்து வீட்டில் வசிக்கிறான் லியான். தன் குட்டி தம்பியை தவிர அந்த வீட்டில் யாரையும் அவளுக்கு பிடிக்காது. 

ஸ்டான் என்னும் DEA ஏஜென்ட் , போதை பொருட்களை மறைத்து வைக்க மதில்டாவின் தந்தையை  பயன்படுத்தி அவன் வீட்டில் போதை பொருட்களை ஒளித்துவைக்க  கொடுப்பது வழக்கம். ஆனால் அவன், யாருக்கும் தெரியாமல், அதிலிருந்து சிறிது சிறிதாக போதை பொருட்களை திருடுகிறான். இந்த உண்மை தெரியவர, ஸ்டான் தன் அடியாட்களை அனுப்பி மதில்டாவின் குடும்பத்தை கொலைசெய்ய சொல்கிறான்.

ஸ்டான் ஆட்கள் வீடிற்கு வரும் சமயத்தில் மதில்டா கடைக்கு சென்றிருப்பதால், அவளை தவிர அனைவரையும் கொன்று விடுகிறார்கள். அந்த சமயத்தில் வீடிற்கு வரும் மதில்டா, நிலைமையை உணர்ந்து, தன் வீடிற்கு செல்லாமல், லியான் வீட்டு கதவை தட்டுகிறாள். சற்று யோசிக்கும் லியான், அவளுக்கு அன்று இரவு மட்டும் அடைக்கலம் தருவதாக கூறுகிறான். அவளோ, தன் தம்பியை கொன்றவர்களை பழி வாங்கவேண்டும்  என்றும், வீட்டு வேலைகளை செய்வதாகவும், தனக்கும் துப்பாக்கி சுடுவதற்கும், அவனுக்கு தெரிந்த வித்தைகளை கற்றுகொடுக்குமாறு வேண்டுகிறாள். இதற்கிடையில், அவளின் போட்டோவை கொடுத்து அவளையும் கொலைசெய்ய சொல்கிறான் ஸ்டான்.

இருவரும் அந்த வீட்டை விட்டு வேறு வீட்டிற்கு செல்கின்றனர். லியான் படிப்பறிவு இல்லாதவன் என்பதால், அவனுக்கு படிக்க கற்றுக்கொடுகிறாள் மதில்டா. தனக்கு தெரிந்த துப்பாக்கி சுடும் வித்தைகளை கற்றுக்கொடுகிறான் லியான். பின்னர், வீட்டில் ஒரு கடிதத்தை லியானுக்கு எழுதி வைத்து விட்டு,ஸ்டான்- ஐ கொலைசெய்ய, ஒரு சிறிய பையில், துப்பாக்கியை வைத்து, DEA ஆபீஸ்க்கு செல்கிறாள். ஸ்டானிடம் மாடிக்கொள்ளும் அவளிடம், லியான் தன் 2 அடியாட்களை கொலை செய்துவிட்டதாக  கூறிகிறான். அங்கு வரும் லியான் மதில்டாவை காப்பாற்றுகிறான்.மதில்டாவிர்க்கு லியான் ஐ மனதிற்குள் பிடித்துப்போக, அவள் லியானை காதலிப்பதாக  கூறுகிறாள். இருப்பினும், அதை பெரிதாக கண்டு கொள்ளாமல் இருக்கிறான் லியான்.

டோனியை மிரட்டி, லியான் இருக்கும் வீட்டை கண்டுபிடித்து அவனை கொலைசெய்ய ஆட்களுடன் செல்கிறான் ஸ்டான். அவன் லியான் மற்றும் மதில்டாவை கொலை செய்தானா? அவர்களை சுற்றிலும் சூழ்ந்த ஸ்டானின் ஆட்களிடம் இருந்து  தப்பித்தார்கள்? லியான் மதில்டாவை காபாற்றினானா? மதில்டா நினைத்தது போல ஸ்டானை பழிவாங்கினாளா? இது தான் இறுதி கிளைமாக்ஸ்.

நான் ரசித்த காட்சி, வீட்டை விட்டு செல்லும் அவர்கள் ஒரு ஹோட்டல் அபார்ட்மேட்டுக்கு செல்வார்கள். முதலில் மதில்டா தனக்கும் தன் தந்தை லியானுக்கும் ரூம் வேண்டும்  என்று ஹோட்டல் மேனேஜரிடம் சொல்வாள். சிறிது நாட்களுக்கு பின்பு அவரிடம் தான் பொய் சொன்னதாகவும், லியான் தந்தை இல்லை என்றும் தன் காதலர் என்பாள்.  பதறிப்போன மேனேஜர் இருவரை ஹோட்டலை விட்டு வெளியேற்றிடுவார்.

லியான் தன் நண்பன் என்று கூறி ஒரு பூந்தொட்டியில் ஒரு செடியை வளர்ப்பான். இறுதி காட்சியில் அந்த செடியை மண்ணில் நடுவாள் மதில்டா. இந்த காட்சி மிக அழகாக இருக்கும்.  

இந்த படம் நடிக்கும் பொது Natalie Portmanனுக்கு வயது 11 தான். ஆனலும் 11 வயது சிறுமிக்கு எப்படி புகை பிடிக்க கற்று கொடுத்தார்களோ தெரியவில்லை!!! விறுவிறுப்பான படம். நீங்கள் என்ஜாய் பண்ணி பார்க்கலாம்.

The Magnificent Seven - திரைவிமர்சனம்

[The Magnificent Seven - திரைவிமர்சனம் ]

John Sturges இயக்கிய இத்திரைப்படத்தில் Eli Wallach (Calvera) , Yul Brynner (Chris Larabee Adams) , Charles Bronson (Bernardo O'Reilly) மற்றும் பலர் நடித்துள்ளனர். Akira Kurosawa  இயக்கிய Seven Samurai என்ற ஜப்பானிய மொழி படத்தின் ரீமேக் என்றாலும் ஒரிஜினல் படத்தை அடித்துக்கொள்ள முடியவில்லை என்றே சொல்லவேண்டும். ஏனென்றால் ஒரிஜினல் செவென் சமுராய் படத்தில் விவசாயிகளுக்கும் சமுரைகளுக்கும்  இடையே உள்ள ரிலேஷன்ஷிப்  மிக அற்புதமாக இருக்கும். இத்திரைப்படம் சிறந்த இசைக்காக  (Elmer Bernstein) ஆஸ்கார் அவார்ட்ஸ்க்கு பரிந்துரைக்கப்பட்டது.

John Sturges,  The Great Escape, Bad Day at Black Rock,The Eagle Has Landed போன்ற படங்களை இயக்கியுள்ளார். Eli Wallach  பற்றி என்ன சொல்வது? நடிப்புலகில் மிக பெரிய ஜாம்பவான். இவருடைய மாஸ்டர் பீஸ் என்றால் அது அவர் நடித்த " The Ugly" கேரக்டர் தான். Yul Bryner, The King and I என்ற படத்திற்கு ஒரு ஆஸ்கார் வாங்கியுள்ளார். இத்திரைப்படத்தை பார்க்க முக்கிய காரணங்கள் படத்தின் இசை, Eli Wallach மற்றும் Yul Brynner-ன் நடிப்பு.

சரி படத்தின் கதை என்ன என்பதைப் பார்போம். கல்வேரா ஒரு கொள்ளைகூட்டதின் தலைவன். அவனும் அவன் கூட்டமும் சேர்ந்து ஒரு Mexican கிராமத்தை  அடிக்கடி கொள்ளை அடிகின்றனர். அறுவடை  காலம் வரும் போது சரியான நேரத்திற்கு வந்து கொள்ளை அடிக்கும் அவர்கள், மறுபடியும் வருவதாக கூறிவிட்டு செல்கின்றனர். ஏழை கிராமம் என்பதால் அவர்களால் ஒன்றும்  செய்ய  இயலவில்லை.

அந்த ஊரின் இரண்டு விவசாயிகள் , கிராமத்தை காப்பாற்ற கௌபாய் வீரர்களை தேடி டவுனிற்கு செல்கின்றனர். அங்கு கிரிஸ்- ஐ பார்க்கும் அவர்கள், தங்கள் கிராமத்தின் கதையை சொல்லி தங்களை காப்பாற்ற வேண்டும் என்று மன்றாடி கேட்டு கொள்கின்றனர். சரி என்று சொல்லும் அவன், பெரிய கூட்டம் என்பதால், தனியாக  செல்ல முடியாது என்று தன்னுடன் சேர்ந்து கொள்ளையர்களை விரட்ட சில கௌபாய்களை தேடுகின்றான்.

மற்ற வீரர்களை தேடி பிடிக்கும் காட்சிகளில், ஒவ்வொரு கௌபாய்-க்கும் ஒரு சின்ன இன்றோ இருக்கும்.  அனைத்தும் அற்புதமான காட்சிகள்.அதில் சிக்கோ என்பவன், கிரிஸ் -இன் ரசிகன். ஆதலால் தன்னையும் சேர்த்து கொள்ளுமாறு கேட்கிறான். ஆனால் அவனுக்கு அனுபவம் இல்லை என்பதால் முடியாது என்று கூறிவிடுகிறான்.  ஆறு கௌபாய்களோடு கிராமத்திற்கு செல்கின்றனர். வழியில் அவர்களை பின்தொடர்கிறான் சிக்கோ. கிராமத்தை அடைந்த பின்னர், கிராமத்தார் யாருமே அவர்களை வரவேற்க வரவில்லை. காரணம் யாரை பார்த்தாலும் அவர்களுக்கு பயம். அப்பொழுது, அங்கு உள்ள ஆலயத்தின் மணியை அடித்து, அவர்கள் வந்திருக்கும் நோக்கத்தை சொல்கிறான் சிக்கோ. இவனையும் சேர்த்து இப்பொழுது ஏழு கௌபாய்கள்.

கிராம மக்கள் அவர்களை நம்பாமல் தங்கள் வீட்டு பெண்களை வெளியே ஒரு இரகசிய இடத்தில ஒளித்து வைக்கின்றனர். அவர்களுக்கு அந்த ஏழு பேரின் மீது நம்பிக்கை இல்லை. சிறிது சிறிதாக, அவர்களை நம்ப தொடங்கும் விவசாயிகளுக்கு துப்பாக்கி சுடுவதற்கும், அந்த கொள்ளை கூட்டம் வந்தால் எப்படி சமாளிக்கலாம் என்று திட்டம் தீட்டுவதற்கும் சொல்லிக்கொடுகிறார்கள்.

அப்பொழுது, கல்வேரா தன் மூன்று  உளவாளிகளை, கிராமத்தை நோட்டம் பார்க்க அனுப்புகிறான். ஆனால் அவர்களை கௌபாய்க்கள் கொன்று விடுகின்றனர். தன் கூடத்திற்கு உணவு இல்லை என்பதால், கிராமத்தை கொள்ளை அடிக்க வருகிறான் கல்வேரா. முன் ஏற்பாட்டுடன் இருக்கும் அவர்களை தாக்குகின்றனர் கிராம மக்களும், வீரர்களும். சில கொள்ளையர்கள் இறந்தாலும், கல்வேரா தப்பித்து சென்று விடுகிறான். அவனை தாக்கி விட்டதால், அவன் பயந்து பொய் திரும்ப வரமாட்டான் என்று நினைக்கும் கிராம மக்கள், சந்தோஷத்தில் உள்ளனர். ஆனால், சிக்கோ அவர்கள் கூட்டத்தில் ஒரு ஆளாக வேவு பார்த்து வந்து, அவர்கள் போகவில்லை என்றும் ஒரு பெரிய கூடமாக இருகிறார்கள் என்றும், அவர்களுக்கு உணவு இல்லை என்பதால் கிராமத்தை கொள்ளை அடிக்க எந்த நேரமும் வரலாம் என்று சொல்கிறான்.

பயந்து போகும் கிராம மக்கள், கல்வேராக்கு பணிந்து போகலாம் என்று ஒரு சிலரும், அவனை எதிர்த்து போராடலாம் என்று வேறு சிலரும் கூறுகின்றனர். ஆனால் அவர்களை தாக்கலாம் என்று கௌபாய்கள் அவர்களை தேடி கிராமத்திற்கு வெளியே செல்கின்றனர். ஆனால் அவர்களை காணவில்லை. கிராமத்திற்கு வரும் அவர்களுக்கு ஒரே அதிர்ச்சி. கல்வேரா கிராமத்தில் உள்ள அனைவரையும் சிறை பிடித்து வைத்திருக்கிறான். இந்த மக்களுக்காக சண்டை போட இவர்கள் அருகதை அற்றவர்கள் என்றும் இந்த கிராமத்திற்குள் வர இவர்களில் சிலர் தான் உதவி புரிந்தார்கள் என்று சொல்கிறான் கல்வேரா. 

அதிர்ந்து போகும் அந்த ஏழு பேரும் என்ன செய்தார்கள்? கல்வேரா அவர்களை கொன்று விட்டானா? அந்த கிராமத்திற்காக  சண்டை போட வந்த அவர்களையே காட்டிகொடுத்த அந்த கிராமத்தினரை என்ன செய்தனர்? இது கிளைமாக்ஸ்.

அடிக்கடி ஒரே மாதரியான படம் பார்த்து போர் அடித்துவிட்டால் இதுபோன்ற வித்தியாசமான ஒரு western படம்  பார்க்கலாம்.

தாயகம் சென்றுவிட்டதால் இந்த நீண்ட இடைவெளிக்கு மன்னிக்கவும்.
 

The Shining - திரை விமர்சனம்

The Shining - திரை விமர்சனம்

ஒரு ஹாரர் த்ரில்லர் வகை படம் எப்படி இருக்க வேண்டும் என்பதற்கு மிகச்சிறந்த உதாரணம் இந்தப்படம். ஒரு ஹாரர் த்ரில்லர் வகை திரைப்படத்தை ஒருமுறை பார்க்கலாம், இரண்டாவது முறை பார்க்கும் போது சஸ்பென்ஸ் உடைந்ததால் போர் அடிக்கத்துவங்கும், ஆனால் இந்தப்படத்தை நீங்கள் எத்தனை முறை பார்த்தாலும் கொஞ்சம் கூட போர் அடிக்காத, பார்வையாளர்களை சீட்டின் நுனிக்கு வரவைக்கும் இந்தப்படம். திரைக்கதையில் ஸ்டான்லி க்யுப்ரிக் (Stanley Kubrick) பல முடிச்சுகளை போட்டு இருப்பார், அதை இரண்டாவது முறை பார்க்கும் போது தான், நாம் படம் பார்க்கும் போது பல முடிச்சுகளை தவற விட்டது தெரியும். ஹாரர் த்ரில்லர் வகை படங்களில் இது தான் மாஸ்டர் பீஸ். இந்த வகை படங்களில் இதுபோல ஒரு படம் இதுவரை வந்ததில்லை என நிச்சயமாக கூறலாம்.

ஹாலிவுட்டின் மிகச்சிறந்த இயக்குனர்களில் ஒருவரான ஸ்டான்லி க்யுப்ரிக்(Stanley Kubrick)இப்படத்தை இயக்கியுள்ளார். இவரை பற்றி சொல்லவேண்டுமானால் இந்த பதிவு போதாது. இவர் எடுத்தது மொத்தம் 13  படங்கள் தான், அதில் The Killing, Full Metal Jacket, Paths of Glory, Spartacus, Dr.Strangelove, 2001: A Space Odyssey, A Clockwork Orange, Barry Lyndon என அத்தனை படங்களும் IMDB Top 250- ல் உள்ளவை. அத்தனையும் ஒவ்வொரு வகையில் மாஸ்டர் பீஸ்கள். இயக்குனர்களில் இவர் ஒரு ஜீனியஸ். இவருக்கென்று ஒரு மிகப்பெரிய ரசிகர் பட்டாளமே உண்டு.

கதையின் நாயகனாக நடித்திருக்கும் ஜாக் நிக்கல்சன்(Jack Nicholson) நடிப்புலகின் முடிசூடா மன்னர்களில் ஒருவர். இவரது நடிப்பின் மிகப்பெரிய ரசிகன் நான். நடிகர்களுக்கு ஸ்க்ரீன் பிரசன்ஸ் மிகவும் முக்கியம், அதில் இவரை அடித்துக்கொள்ள ஆளே கிடையாது. பத்து பேர் இருக்கும் ஒரு காட்சியில் கூட இவர் மட்டும் தனியாக தெரிவார். 12  முறை ஆஸ்கர் விருதுக்கு பரிந்துரைக்கப்பட்டு 3  முறை வென்றவர். 

மனுஷன் இந்தப்படத்தில் பின்னி பெடல் எடுத்து இருப்பார். எல்லாருக்கும் Batman  படங்களில் வரும் Joker கேரக்டர் ரொம்ப பிடிக்கும், அதிலும் The  Dark  Knight படத்தில் ஜோக்கராக நடித்த Heath  Leadger - ஐ மிகவும் பிடிக்கும். ஆனால் என்னை பொறுத்தவரையில் Tim  Burton  இயக்கிய Batman  படத்தில் ஜோக்கராக நடித்திருக்கும் ஜாக் நிக்கல்சன் நடிப்புதான் அட்டகாசம்.

 இந்தப்படத்தில் ஜாக் நிக்கல்சன் (Jack Torrence)ஆகவும், Shelley Duvall அவரது மனைவி  Wendy Torrence-ஆகவும், Danny Lloyd  அவர்களது 6 வயது மகன் Danny Torrence-ஆகவும் நடித்துள்ளனர். Stephen King  எழுதிய The Shining-1977 என்ற நாவலை தழுவி தான் இந்தத்திரைப்படம் எடுக்கப்பட்டது.

 காலராடோ என்ற ஊரின் மலை உச்சியில் அமைந்துள்ள ஒரு மிகப்பெரிய ஹோட்டலை பனி பொழியும் நாட்களில் பாதுகாப்பதற்காக தன் மனைவி மற்றும் மகனுடன் செல்கிறான் ஜாக் டோர்ரன்ஸ். பனிக்காலம் என்பதால் பனிப்பொழிவு அந்தப்பகுதியில் மிக அதிகமாக இருக்கும், அந்த சமயத்தில் ஹோட்டல் இயங்காது. அதனால் ஹோட்டலை பராமரிக்கும் பணிக்கு ஜாக் டோர்ரன்ஸ் அமர்த்தப்படுகிறான், அந்த சமயத்தில் அவன் குடும்பம் மட்டும் தான் அங்கு இருக்கும். எழுதுவதில் ஆர்வமுள்ள ஜாக் டோர்ரன்ஸ் இந்த தனிமை தனக்கு எழுதுவதற்கு உபயோகமாக இருக்கும் என்று நினைத்து இந்த வேலையை ஏற்றுக்கொள்கிறான். இந்த பணியில் சேரும் முன்பு அந்த ஹோட்டல் மேனேஜர் சில வருடங்களுக்கு முன் ஒரு சம்பவம் நடந்ததாக ஜாக்கிடம் கூறுகிறான். அங்கு அவனைப்போல ஹோட்டலை பாதுகாப்பதற்கு வரும் ஒருவன் தனிமையின் காரணமாக பித்துப்பிடித்து தன் மனைவி மற்றும் இரு  பெண் குழந்தைகளையும் கொன்று, பின்பு தானும் தற்கொலை செய்து கொள்கிறான் என்று ஜாக்கிடம் சொல்கிறான். ஜாக் இந்த சம்பவத்தை பெரிதுப்படுத்தாமல்  பணியில் சேருகிறான்.

அவர்களது மகனுக்கு ESP (Extrasensory perception ) எனப்படும் சக்தி உண்டு, நடந்த சம்பவங்கள் மற்றும் நடக்கபோகும் சம்பவங்களை முன்கூட்டியே அறியும் மற்றும் பார்க்கும் திறன். இந்த அபூர்வ சக்தியை பற்றி அவனது பெற்றோருக்குக் கூட தெரியாது. அவன் நடக்கப்போகும் சில சம்பவங்களை பற்றி தன் அம்மாவிடம் சொல்லும்போது, அதை அவள் நம்பாமல் அவனுக்கு ஏதோ குறை என்று எண்ணுகிறாள்.

ஹோட்டலுக்கு வரும் ஜாக்கின் குடும்பத்திற்கு ஹோட்டலை சுற்றிக்காட்டுகிறார் அங்கு வேலை செய்யும் சமையல்காரர், அவருக்கும் ESP (Extrasensory perception ) எனப்படும் சக்தி உண்டு. டேனியிடமும் அந்த சக்தி இருப்பதை அறிந்து கொள்கிறார். அந்த ஹோட்டலில் ரூம் 237 -க்கு மட்டும் போக வேண்டாம் மற்றும் அந்த ஹோட்டலில் கெட்ட சக்தி இருக்கிறது  என்று எச்சரித்து விட்டு கிளம்புகிறார்.

 தனது மனைவி மற்றும் மகனுடன்  ஜாக் அங்கு தனியாக வசிக்க துவங்குகிறான் , ஜாக் தனது புத்தகம் எழுதும் வேலையில் மூழ்கிப்போகிறான். அவனது மனைவி சமையல் வேலைகளை கவனித்து வருகிறாள், மகன் டேனி தனியாக விளையாடிக்கொண்டு இருக்கிறான். டேனிக்கு அவனது மூன்று சக்கர வண்டியில் ஹோட்டல் முழுவதும் சுற்றுவது தான் வழக்கம்.  

 அந்த சமயத்தில் அந்த ஹோட்டலில் இறந்து போனதாக சொல்லப்படும் இரு பெண் குழந்தைகளின் உருவம் மற்றும் லிப்ட்-ல் இருந்து ரத்தம் ஆறு போல பாய்ந்து வருவது அடிக்கடி டேனிக்கு மட்டும் தெரிகிறது. அந்த ஹோட்டல் முழுவதும் அவன் மூன்று சக்கர வண்டியில் சுற்றுவதை மிக அழகாக ஒரு அதிர்வு கூட இல்லாமல் ஒளிப்பதிவு செய்யப்பட்டிருக்கும். இந்தப்படத்தில் உள்ள மிகச்சிறந்த காட்சிகளில் ஒன்று இது.

சில நாட்களுக்கு  பிறகு ஜாக்கால் முன்பு போல எழுத முடியாமல், அமைதி, தூக்கம் இன்றி தவிக்கிறான், மனைவியிடமும் எரிந்து எரிந்து விழுகிறான். அவன் எழுதிகொண்டிருக்கும் போது, தொந்தரவு செய்ய வேண்டாம் என்று அவளை எச்சரிக்கிறான். ஜாக் திடீர் தீடிரென்று தூக்கத்தில் கத்துகிறான் யாரிடமும் பேசாமல்  மனநிலை பாதிக்கப்பட்டவனை போல் ஆகிறான்.

பனிப்பொழிவு உச்சத்தை அடைகிறது, ஹோட்டலை விட்டு செல்ல முடியாதவாறு மிகக்கடுமையான பனிப்பொழிவு. தொலைதொடர்பு சாதனங்கள் வேலை செய்யாமல், அதனால் வெளி உலகத்துடனான தொடர்பு முற்றிலும் இல்லாமல் போகிறது.
டேனிக்கு 237 -ம் அறைக்கு சென்று பார்க்கவேண்டும் என்ற ஆவல் வலுக்கிறது. அப்போது விளையாடிகொண்டிருக்கும் டேனியை நோக்கி ஒரு பந்து 237 -ம் அறையில் இருந்து வருகிறது. திறந்திருக்கும் அந்த அறையில் தனது அம்மா உள்ளே இருக்கிறாள் என்று நினைத்து உள்ளே செல்கிறான். சமையலைறையில் வேலை செய்துக்கொண்டிருக்கும் ஜாக்கின் மனைவி ஒரு அலறல் சத்தம் கேட்டு ஜாக்கிடம் ஓடி வருகிறாள், அவனிடம் என்னவென்று விசாரிக்கிறாள், அதற்கு ஜாக், மனைவி மற்றும் மகனை கொலைசெய்வதாக கனவு கண்டேன் என்று கூறுகிறான். அந்த சமயத்தில் அங்கு வரும் டேனியின் கழுத்தில் யாரோ அறைந்த காயத்தை ஜாக்கின் மனைவி பார்க்கிறாள்.

 இருவரும் இங்கு இருக்க டேனியை அறைந்தது யார்? என்று யோசிக்காமல் அதை செய்தது ஜாக் தான் என்று சந்தேகம் கொள்கிறாள், அதனால் அவனிடம் கோபித்துகொண்டு அவளது அறைக்கு சென்று விடுகிறாள். அவன் எழுதும் இடத்திற்கு வரும் மனைவி அவன் எழுதியதை பார்த்து அதிர்ச்சி அடைகிறாள். "All work and no play make Jack a dull boy" என்று திரும்ப திரும்ப இதே வரிகளை ஜாக் ஆயிரக்கணக்கான பக்கங்களில் டைப் செய்து வைத்திருக்கிறான். 

எழுதுகிறேன் என்று கூறிவிட்டு, ஒரே ஒரு வரியை மட்டும் திரும்ப திரும்ப ஜாக் டைப் செய்வது ஏன்?   

அவன் உண்மையில் மனநிலை பதிக்கப்பட்டுள்ளனா? அல்லது அந்த ஹோட்டலில் உள்ள அமானுஷ்ய சக்திகள் அவனை ஆட்டி படைக்கின்றனவா?

உண்மையில் டேனியை அறைந்தது யார்?

அந்த 237 -ம் அறையில் அப்படி என்னதான் உள்ளது?  இது போன்ற நிறைய புதிர்களுக்கான பதில்களை இந்த முதுகெலும்பை சில்லிட வைக்கும் படத்தை பார்த்து தெரிந்துக்கொள்ளுங்கள்.

 ஹாரர், த்ரில்லர் வகை படங்கள் எப்பொழுதும் மனிதர்களையோ அல்லது பேய்களை மிகவும் அகோரமாக காட்டி பார்வையாளர்களை பயமுறுத்துவார்கள்.. ஆனால் இந்தப்படத்தில் அப்படி கிடையாது, காட்சி அமைப்பு மற்றும் ஜாக்கின் நடிப்பிலயே பார்வையாளர்களை பயமுறுத்தி விடுவார்கள். இந்தப்படத்தில் ஒளிப்பதிவு அட்டகாசம். ஒவ்வொரு காட்சியும் wallpaper  போல இருக்கும், மிக சிரத்தையாக எடுத்திருப்பார் இயக்குனர் ஸ்டான்லி குப்ரிக்.

இந்தப்படம் ஹாரர் மற்றும் த்ரில்லர் பட ரசிகர்களுக்கு மிகப்பெரிய விருந்து,